Shoqata "Gender, Paqe dhe Siguri" - SHGPS (vazhdim i Shoqatës së Grave me Probleme Sociale) është një organizatë jofitimprurëse, e themeluar në vitin 2000, me aktivitet në të gjithë Shqipërinë dhe veçanërisht në Qarkun e Durrësit. Shoqata synon promovimin e barazisë gjinore në shoqëri dhe mbrojtjen e të drejtave të grave e vajzave. Një ndër shtyllat kryesore të punës së SHGPS, ka qenë dhe vazhdon të mbetet fuqizimi ekonomik i grave dhe vajzave. Shoqata ka punuar në drejtim të fuqizimit ekonomik që prej fillesave të saj, fillimisht në zonën e Spitallës dhe Porto Romanos, duke vijuar më tej me projekte të zbatuara në Strugë, Korçë, Tushemisht e Voskopojë.
Ngritja e inkubatorëve artizanalë në Tushemisht e Voskopojë dhe ngritja e Biznesit Social “DUART E ARTA” kanë qenë ndër aktivitetet më me rëndësi dhe impakt në drejtim të fuqizimit ekonomik të grave e vajzave. Këtë eksperiencë të mrekullueshme, e kemi sjellë edhe në Durrës, përmes Inkubatorit Social “Duart e Arta”, i cili vijon të shërbejë dhe të kontribuojë në mbështetjen dhe fuqizimin e vajzave dhe grave.